Itinatampok ng Tatlong Dula (na itinanghal ng Dulaang UP) ang Umaaraw, Umuulan, Kinakasal ang Tikbalang na hango sa maikling kuwentong pangkabataan ni Gilda Cordero-Fernando na pinamagatang “The Magic Circle.” Mula ang Bilanggo ng Pag-ibig sa memoir na pinamagatang Prisoner of Love ni Jean Genet. Hinalaw ang Tisoy Brown: Hari ng Wala sa dulang Peer Gynt ni Henrik Ibsen.

Ang tatlong dulang ito ay pagpapatunay rin ng patuloy na kolaborasyon nina Rody Vera at José Estrella, direktor ng lahat ng mga dula. Sa loob ng apat na taon, nagbunga ang kolaborasyong ito ng iba pang mga proyektong panteatro.